ના હોય.... ગાંઠિયા સૌથી ખરાબ ફૂડ? ભારતના 10 સૌથી ખરાબ ફૂડમાં આપણા ગાંઠિયા બીજા નંબરે

ના હોય…. ગાંઠિયા સૌથી ખરાબ ફૂડ? ભારતના 10 સૌથી ખરાબ ફૂડમાં આપણા ગાંઠિયા બીજા નંબરે

દુનિયાભરમાં જુદી જુદી ફૂડ વાનગીઓ મળે છે અને દરેક લોકોને અલગ અલગ ટેસ્ટ મુજબ આ વાનગીઓ ભાવતી હોય છે અથવા તો નથી ભાવતી, પરંતુ કેટલીક એવી ફૂડ ડિશ છે જેની બોલબાલ દેશથી લઈને વિદેશમાં હોય છે. ત્યારે ટેસ્ટ એટલાસ નામની એક રેટિંગ એજન્સી દ્વારા દર વર્ષે દુનિયાભરના જુદા જુદા દેશની ફૂડ વાનગીઓની લોકપ્રિયતા વિશે સર્વે કરવામાં આવે છે અને તેના આધારે ટોપ-10 બેસ્ટ ફૂડ આઇટમ અને ટોપ-10 ખરાબ ફૂડ આઇટમનું લિસ્ટ બહાર પાડવામાં આવે છે. જોકે આ વખતે બહાર પડેલા લિસ્ટમાં એક ગુજરાતી તરીકે આપણને બધાને ચોંકાવી દે તેવું એક નામ ભારતની સૌથી ખરાબ ફૂડ ડિશના ટોપ-10 લિસ્ટમાં સામેલ છે. આ વાનગી એટલે ગાંઠિયા, એજન્સીના સર્વે મુજબ ભારતની સૌથી 10 ખરાબ ફૂડ આઇટમમાં ગાંઠિયા બીજા નંબરે આવે છે.

ટોપ-100 સૌથી ખરાબ ફૂડ પૈકી ટોચના 10ની વાત કરીએ તો આ લિસ્ટમાં ક્રમાનુસાર મીસી રોટી, ગાંઠિયા, ગાજર મટરનું શાક, નદન મીન કરી, મટર મશરૂમ, રીંગણા બટેટાનું શાક, ગજક, પાન્તા ભાત, રવા ઇડલી અને ચૂરમાનો સમાવેશ થાય છે. જોકે તમે જો આ નામ જાણીને ચોંકી જતા હોવ તો વાત આટલેથી જ નથી અટકતી. આ લિસ્ટમાં બીજી ઘણી એવી ફૂડ ડીશનું નામ છે જે તમને કદાચ ખૂબ ભાવતી હોઈ શકે છે.

અહીં ખાલી આપણે ટોપ-10 ખરાબ ફૂડની જ વાત કરી છે જ્યારે ટોપ-100માં તો ગાજરનો હલવોથી લઈને ગુજીયા, મટકા કુલ્ફીથી લઈને કલાકંદ તેમજ કચોરીથી લઈને મસાલા પાપડ જેવી ફૂડ આઇટમનો પમ સામવેશ થાય છે. સર્વે મુજબ આ ફૂડ આઇટમ્સ ભારતના 100 સૌથી ખરાબ ફૂડ છે. ટેસ્ટ એટલાસના રેટિંગ મુજબ ગાંઠિયા ભારતનું પહેલા નંબરનું સૌથી ખરાબ સ્ટ્રીટ ફૂડ છે જ્યારે ભારતીય નાસ્તાના સેગમેન્ટમાં પણ ગાંઠિયાને સૌથી ખરાબ લિસ્ટમાં ટોપ પર રાખવામાં આવ્યા છે. આ જ રીતે દુનિયાના ટોચના સૌથી ખરાબ સ્ટ્રીટ ફૂડમાં ગાંઠિયા 9માં નબરે આવ્યા છે.

જોકે પ્રતિ વર્ષ ટેસ્ટ એટલાસ દ્વારા આ સર્વે બહાર પાડવામાં આવે છે અને તેમના દાવા મુજબ TasteAtlas ફૂડ રેન્કિંગ TasteAtlasના ઓડિયન્સના રેટિંગ પર આધારિત છે, જેમાં એવી પદ્ધતિઓની ઉપયોગ કરવામાં આવ્યો છે જે વાસ્તવિક યુઝર્સને ઓળખે છે અને બોટ, રાષ્ટ્રવાદી અથવા સ્થાનિક દેશભક્તિ આધારીત રેટિંગ્સને અવગણે છે, અને સિસ્ટમ દ્વારા જાણકાર તરીકે ઓળખાતા હોય તેવા યુઝર્સના રેટિંગને વધારાનું મૂલ્ય આપવામાં આવે છે.

ટેસ્ટ એટલાસના જણાવ્યા મુજબ 17 માર્ચ, 2026 સુધી “100 સૌથી ખરાબ ભારતીય ફૂડ”ની યાદી માટે 19,944 રેટિંગ રેકોર્ડ કરવામાં આવ્યા હતા. જેમાંથી 15,211 ને સિસ્ટમ દ્વારા કાયદેસર તરીકે માન્યતા આપવામાં આવી હતી. જોકે TasteAtlas રેન્કિંગને ફૂડ વિશેના અંતિમ વૈશ્વિક નિષ્કર્ષ તરીકે ન જોવું જોઈએ. તેમનો હેતુ ઉત્તમ સ્થાનિક ફૂડ આઇટમને પ્રોત્સાહન આપવાનો, પરંપરાગત વાનગીઓમાં ગૌરવ જગાડવાનો અને તમે જે વાનગીઓ ટેસ્ટ નથી કરી તેના પ્રત્યે જિજ્ઞાસા જગાડવાનો છે.

આ સર્વે અને તેના પરિણામને લઈને લોકોએ જુદી જુદી કોમેન્ટ કરી છે. ટેસ્ટ એટલાસના જે પેજ પર આ સર્વે પ્રકાશિત થયો છે તેના કોમેન્ટ સેક્શનમાં યુઝર્સે પોતાના પ્રતિભાવ આપ્યા છે. જેમાં દિશા કુમાવત નામના એક યુઝર્સે લખ્યું કે, ‘ખરેખર, તમને ભારતીય ફૂડ વિશે કંઈ ખબર જ નથી’. જ્યારે સુભયાન બાગ નામના એક યુઝરે લખ્યું કે, ‘મને ખબર નથી કે તમારો પ્રોબ્લેમ શું છે, પરંતુ આ વાંધાજનક છે, અહીં ઘણી એવી વાનગીઓ છે જે કેટલાક રાજ્યોમાં લોકો માટે ફક્ત ફૂડ નથી પણ જીવનરેખા સામાન છે.’અન્ય એક યુઝરે તો આ સર્વેને જ પાયાવિહોણો ગણાવીને કહ્યું કે લોકોએ આમને સીરિયસ લેવા ન જોઈએ અને તમારે સ્થાનિક લોકોને જ પૂછવું જોઈએ કે ત્યાં શું સારી આઇટમ મળે છે અને તેમના કહ્યા મુજબ ફૂડ ચોઇસ કરવી જોઈએ. યુઝરે દાવો કર્યો કે આ સર્વે કરનારને ભારતીય પરંપરા અને ભારતીય ફૂડ આઇટમ વિશે કોઈ પ્રાથમિક જાણકારી જ નથી.